Foto: Nick Oostendorp
Columns

Kollumn | Gezeik

Gezeik

Een situatie wo'at iederene wel 's met te maken hef 'ehad. I'j vertrekt van huus of van woar dan ook, bunt net ondèrweg en merkt gaddakke, ik had veur vertrek nog effen noar 't huusken 'emot. De nood wödt egals hoger. I'j denkt bi'j ow eiges: woar is een winkel wo'ak een kleinigheid kan kopen en wo'at een toilet is. Nog een stuksken wietèr en dan denk i'j, ik hoef ook ga niks te kopen, a'k 't moar kwiet bunne.
T wödt nog meer een kniepende angelegenheid a'j uut de kroeg komt. De vloeistof wie'j in'enommen hebt mot dr ook weer uut. En jaahaa, as kearl zuuk i'j een boom op of een zeikhok en nemt de leiding in eigen hand. As vrouwmens wödat dat moeilijkèr. Moar niet onmeugelijk.
Now bunt dr regels wie't verbiedt; dee zegt da'j niet in 't wild mögt plassen. Veur ow eiges bunt dr regels wie't zekt: loat ow niet trappieren deur oplettende wetshandhavèrs. Wel trappiert dus. Of i'j effen 130 euro's wilt aftikken. Niet betalen dus. Loat de rechter moar zeggen dat dr völs te weinig openbare toiletten bunt veur vrouwluu. Dat hef 'e dan ook 'ezegd. Op papier kon den besten man ook niet andès. Wel bunt dr now ambtenaren wakkèr 'eschudt wie't goat kieken of dr ook meer toiletten könt kommen veur vrouwluu. Da's dan mooi met'enommen. Ook veur de NL-staat: is weer 130 euro riekèr!
Tis net as de wolvin in Klein Zwitserland: i'j ontsnapt, wilt weer terugge en as dank wodt i'j dood 'eschotten. Of dat doodzieke 10-jeurige Afghaanse jungesken in Drenthe wie't van de oldèrs is af'enommen. Sommige beslissingen in bepoalde situaties kö'j niet uutleggen. Probeert dichte bi'j huus moar 's te begriepen woarumme Stichting Aktief dr in één keer met mos uutscheiden! Dr bunt moar gans weinig luu wie't dat snapt. Was 't een ordinaire moatregel um te bezuunigen? Schienboar was de nood zo hoge dat dr een boom mos wodden op'ezocht um van 't gezeik af te kommen.
Effen gans wat andès: kommende moandagoavend wödt bekend 'emaakt wie't meister(in) van de börgèrs wödt in onze gemeente. En dat is gin gezeik!

Hol ow goed!
H. Eurneman

reageer als eerste
Meer berichten
<SCRIPT SRC="//secure.adnxs.com/ttj?id=5743950&cb=[CACHEBUSTER]&referrer=dinxpersnieuws.nl&pubclick=[INSERT_CLICK_TAG]&postcode=706,708,709,710,711,712,713,714,715,716,717,718,719,720,721,722,723,724,725,726,727,728,729,730,731,732,733,734,735,736,737,738" TYPE="text/javascript"></SCRIPT>