Foto: Nick Oostendorp
Columns

Kollumn | Ni'jjoar

Ni'jjoar

De kop is dr af. Al weer een wèke lève wi'j in 2018. Tis vake effen wennen moar ook dat geet snel. 'T kruut is weer verschotten, met allerhande drankjes is dr geproost op 't ni'je joar en wi'j hebt ons de boek striepèrdikke 'egèten an de puffèrkes. Mietoe. Smieken aldèrbastend goed. En de mooie traditie wödt nog egals in ere 'ehollen dat de laegere-school-blagen op ni'jjoarsdag toeten goat ophalen bi'j femilie en buurte. Holle wi'j dr in!
En mo'w 't nog hemm'n ovèr wat dr allemoale veurigs joar hier en doar is gebeurd? Ovèr 't weer? Kan altied. Ovèr fipronil? At ow dat is ovèrkommen….. wat een ellende. En bu'j nog één van die weinige luu wie't nog gin bitcoins hef? I'j loopt achtèr! En 't mot toch können da'j in vrede op elk moment een breudjen kroket könt èten! Voetbal of gin voetbal: DRAN! Of was dat soms allemoale nepni'js? Dacht 't niet!
Dichtèrbi'j, hier in darp en umstreken, was dr ook van alles te doene. De kerstbeume-verkopèrs hebt goeje zaken 'edoan. Uut huus ko'j ow ook vermaken in de kroeg: biljattoernooien. En ook traditioneel: zaalvoetbal in de de Eurohal voor de kleinen en de groten van oranje, blauw (2x) en gruun. Wat ducht ow van al die uutvoeringen van de zangkoren en de meziekkorpsen. I'j hadden ze veur ''t uutzuuken.
Suntèrkloas is weer noar Spanje en de kerstkearl hef zien Rudolf met arreslee weer op huus an 'edirigeerd. Tis gewoon weer alledag in jannewari. De blik is weer gericht op veuruut. Wat breg 't ni'je joar? Hoppeluk gezondheid. As eerste.
Bun i'j bi'j 't WK voetbal (ai…..) veur de Belgen of de Duutsèrs? Dit joar zal de omnisportvereniging anfangen in de sporthal. En zal dr weer een stap veuruut wodden 'ezet noar één voetbalclub. Toch? En in meert gemeenteroadsverkiezingen. De ni'je börgermeistèr is geinstalleerd. Den't trouwens wel ovèr 78 ondèrdanen mindèr geet regeren t.o.v. een joar geleden. Zo zie'j moar weer: i'j könt niet alles hemm'n!
Denk dran: Bemint eer ge begint!

Hol ow goed!
H. Eurneman

reageer als eerste
Meer berichten