Kollumn | Toeval

Toeval

Vegangene zondag was 't d'n tienden meert. Now en wat dan nog, zo'j zeggen. De tied geet egal deur, de kommende zondag is 't d'n zeuventienden meert. Toch is 't best wel effen de muujte weerd um stille te stoan bi'j tien meert. Want dat is nameluk de doatum dat de beide voetbalclubs hier uut darp bunt op'ericht. Jaahaa! Zowel de gruunen as de blauwen hebt dezelfden doatum van oprichting in de geschiedenisbuuke stoan. D'n enen in 1922 en d'n andèrn in 1956. Now bunt d'r in 't ganse joar 365 dage. Ens in de vier joar kump d'r ene bi'j. Moar loa'w 't veur 't gemak hollen op 365. I'j hebt dus kans van 1 op 365 dat beide clubs op d'n zelfden dag 't levenslicht zaggen. En hier was die ene minimale kans wel bingo!
Hamvroag: is dat toevallig of niet? Wist iemand dit en hef dit bewust zo 'estuurd of is 't echt stomp toeval dat dit zo is gebeurd? 'T kan ook moar zo wean dat de afspraken zo uutkwammen dat disse doatum noar boaven kwam en dat de luu van toen zeien: niks meer an doene! Zol d'r nog ene wean 'ewest wie't dacht: heeej, da's een bekende doatum. Dan hef den zich wieseluk de mond 'ehollen. Of zollen ze toen al in 't achtèrheufd iets hemmen 'ehad van: een hint um toch de köppe weer bi'j mekare te stèken. Zal wel niet.......
Wat wel zekèr is, is dat d'r now nog twee clubs bunt. Ook is zekèr dat die twee clubs opgoat in één club. De veurbereidingen bunt in volle gang um van 't bestoande sportkomplex iets gans moois van te maken. De clubkleur is bekend. Now nog effen besluuten dat 't logo twee halve breudjes op mekare wordt. Dan könt de Zoerikse en Dinxpèrse bakkèrs ook worden benadèrd as sponsors.
En dan de oprichtingsdoatum van de FC Dinxpèr. Volgens de KNVB-regels mot die ni'je vereniging officieel worden op'ericht uuterluk een half joar noa 30 novembèr 2018. Dat wil dus zeggen op of veur 31 mei a.s. Den doatum is op een vri'jdag, dreks noa Hemelvaartsdag.. Loa'w den doatum dan moar anhollen as oprichtingsdoatum van de ni'je FC Dinxpèr. Kump mooi uut want dan is 't ook nog 's Wereld Niet-Roken dag. En da's gin toeval!

Hol ow goed!
H. Eurneman

Meer berichten